(( أهل جدة ))

  • بواسطة : د. عبدالإله جدع
  • الثلاثاء 7 مارس 2017
  • 3:25 م

 

 

 (( أهل جّدة ))

 

أهل جدّه..

يا أهل الطيبه والرّقّه..

وحشتوني ..

يا أهل العشره والإحساس..

ومعدنكم أصيل ألماس..

أصيله والله ياجده ..

أَصيله في رخا وشدّه..

وحشتيني..

وحشني مسجد المعمار..

وفي العلوي ..زقاق

التّعزي ..والعطّار..

ومقلا عمّنا يعقوب..

وفول السّكني والمعصوب ..

وحارة الشام

وفرن الشيخ وحنّانتو

وعمي إمام ودكانتو..

ومَحلى قشطة الزمر يق

أهل جده ..يا عالين فوق..

يا أحلى الناس ..يا أهل الذوق ..

وحَشتني القعده في المركاز ..

وعمّه سعاد تسلّينا

تحكّي السيره والألغاز..

وحشني البيت والصفه

وحشني السقّه والبازان

ونجري وراه ونتخبّه..

وفي الدرجان..

نطرطش موية الزفة..

وحشني بيتنا العالي..

وحشني مؤخرو القبلي..

وريحة حوتنا المقلي ..

ودهليزو ومقعد

جدّي إبراهيم

وشجر النيم

وحشني صبيّنا أحمد..

على الكر ويته في الدهليز

يكوّع فيها يتمدد ..

وخالتي فتّو تشخط فيه

ي (واد) إشبك بتدّلع..

قوام أجري ..قوام أفزع ..

بلاشي تِمشي تتلكّع..

ترى الكانون خلاص ولّع..

وحشني الحَمله والزنبيل..

وفوق الطّيرمه القنديل ..

وحشني مسجد العكاش..

وخاسكيه ..

ونوريه..

وَينّي خواجه والخشخاش..

وسوق قابل وبسطاتو

علي محسن وكندرتو

يناس عل (عيد) ومدريهتو ..

وحشني عمّنا تيسير..

وحجرو المنقبي والزير..

وعبدالعاطي شيخ بنّه

ولو شنّه ولو رنّه

وبحاره لهم جلبان..

سلامه وغيره والرقبان..

وفى (لمزمار) رجال مطا ليق..

وشون الحاره في تعتيق..

وحشني فيك ياجده..

رطوبة بحرك ادّ شّع

ومِنّك والله ما نشبع ..

وإنتِ غير ..وكلك خير..

وتسخي علينا ..وتراعي ..

وحشني مسجد الشافعي ..

وسوق العلوي والجامع..

وبيت أختي على الشارع..

ياريت ترجعلنا الأيام..

ومافي عكننه وزحام..

ولقمتنا ..تكفّينا

ومافي شَلَمه في الأسعار..

وكل الناس على الستار..

 

مواضيع ذات صلة

What do you think?

ملاحظة : عنوان البريد الإلكتروني الخاص بك لن يتم نشرة

You may use these HTML tags and attributes:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

تحميل...